華姐清湯腩

本地做得出色的牛腩麵家, 寥寥可數, 長期站穩人龍榜首的歌賦街老店「九記」, 吃到街知巷聞. 我的舊居自小與九記為鄰, 霎時勾起兒時回憶, 當年僅四歲的我, 媽媽叫我落街外賣牛腩麵時, 遂即履行我的「小B大任務」, 挽著這個不銹鋼湯罉幫家人買外賣時, 心情戰戰兢兢, 由於店主見我是街坊關係, 照例我的牛腩麵份量加碼放送, 自此這份牛腩味道依然特別深刻, 尤其牛腩伊麵最得我歡心.

今趟推的是清湯腩 - 「華姐清湯腩」, 新分店位於西營盤, 天后是其總店. 或許吃過「九記」的朋友, 總覺華姐的味道失色, 港人偏愛像九記濃味的牛骨湯底, 而我卻抱著清心寡慾一嘗其清湯腩, 故刻意點了熱賣的蘿蔔爽腩河, 腩肉爽口軟腍, 鮮味濃郁, 湯底清新不肥膩, 湯頭亦不會發出陣陣牛羶味, 蘿蔔清甜, 是弄清湯功勞者之一, 河粉幼滑, 連湯喝罷亦不覺滿口油腔. 因此鍾情濃骨湯底的朋友 -「九記」是不二之選; 至於清湯 -「華姐」之湯底卻弄得出色.

店內除了清湯牛腩, 還供應上海菜飯及擔擔麵, 而另一道點叫醉雞菜飯, 純粹是希望再次令我對醉雞改觀, 失望! 其實華姐出品毫不迅色, 但醉雞始終非我杯茶, 儘管再遇上天姿國色也未能令我改觀, 只怪我不懂欣賞 ~ 醉雞。緣慳!